Nagpasalig si Senate President Juan Miguel Zubiri nga mas kay-uhon pa gid sang Senado ang performance kasunod sang komento nga may pila ka mga senador nga daw kulang sa decorum kun yara sa mga hearing.
Matandaan nga si former Senate president Franklin Drilon ang nagmuno sa pagginawi sang iban nga senador nga nagaapekto sa kredibilidad sang senado.
Suno naman kay Zubiri, nahangpan niya ang buot-silingon sang former senate president kag mataas ang iya nga respeto para diri.
“I told Senator Drilon, I fully note your concern, Tito Frank. And I said we will do better when we come back,” suno kay Zubiri samtang nagabasa sang iya reply sa former senator.
Mangin siya suno kay Zubiri ang nagamuno man sa iya nga mga kaupdanan nga magtarong kag ipabilin ang order sa sulod sang Senado.
Matandaan man nga una na nagpangayo sang pasaylo si Senator Ronald Bato Dela Rosa bangud ginpahayag nga guilty siya sa pagluhod-luhod sa salog samtang naga-hearing, kag tuman man ka tunog ang iya kadlaw kun kaisa.
Si Senator Robin Padilla naman ang nagsiling nga wala siya sang plano nga lainon ang iya nga istilo bangud wala man sang pagsulundan nga indi pwede manghusay sang bigote samtang yara sa Senate floor.
Sa pihak nga bahin, wala naman sang kahangawa si Zubiri pananglitan islan siya bilang lider sa Senado. Ini kasunod sang huring-huring nga islan ang Senate leadership kun magbalik na ang sesyon sa Hulyo.
“I serve at the pleasure of my colleagues. If they no longer want me, they can take me out. If they’re still happy with me, they can keep me for as long as they need me,” pahayag sang senate president. #
