Naghanda ang banwa sang Tigbauan sang isa ka semana nga mga aktibidad may kaangtanan sa pag-komemorar sang ika-77 nga anibersaryo sang Liberation of Panay.
Sa interview sang Bombo Radyo kay Phoebe Torrico, municipal tourism officer, iya ginpahayag nga subong nga adlaw ang finale sang mga aktibidad nga pasadyahon pa sang local band.
Sa kinaandan, may yara sang flag raising kag wreath laying ceremony sa Panay Landing Memorial Marker sa Barangay Parara sa amo nga banwa.
Ang banwa sang Tigbauan ang may daku nga pangalan sa maragtas pag-abot sa istorya sang pagsakop sang mga Hapones sa Pilipinas sang World War II.
Sang Marso 18,1945, linibo ka mga tropa sang Amerika ang nagdungka sa baybay sang Barangay Parara, Tigbauan kag sa bulig sang amo nga pwersa sang militar, natigayon nga mapyerde sang Panay guerillas ang Japanese force.
Ang Panay Landing Memorial Marker amo naman ang gintukod kag nagserbe nga tribute agud kilalahon ang kaisog sang mga guerilla.
Samtang, ginkalipay naman sang mga pumuluyo sang Barangay Parara Sur nga nagbalik na ang mga aktibidad may kaangtanan sa Liberation of Panay.
Sa interview sang Bombo Radyo kay Punong Barangay Vicente Torrento, iya ginpahayag na lakip sa ginkakunyagan gid nga aktibidad amo ang baroto bugsay race kag amo man ang palumba sang pumpboat. ##
