Ginkumpirma sang Department of Health (DOH) nga nagapabilin sa high-risk ang Western Visayas bangud sang spike sa COVID-19 cases kag numero sang ginapaospital.
Suno kay DOH chief epidemiologist Alethea de Guzman, magluwas sa Western Visayas, high-risk man ang Davao kag ang Cordillera Administrative Region.
Suno kay De Guzman, ini nga mga rehiyon ang may positive two-week growth kag mas mataas nga average daily attack rates (ADAR) halin June 27 tubtob July 10 ipaanggid sa numero sang mga kaso duha ka seman na ang nagligad.
Santo sa data sang DOH, okupado na ang 87% sang COVID-19 beds sa intensive care units sa Western Visayas as of July 10. Ang ICU occupancy rate naman sa Davao ang yara sa 81%, samtang 68% naman sa Cordillera.
