ILOILO – Nagapangaduha ang Western Visayas (WV) sa may pinakamataas nga kaso sang rabies sa bug-os nga Pilipinas.
Sa interview sang Bombo Radyo kay Dr. Pacifico Lumauag, rabies control coordinator sang Department of Agriculture (DA) Region 6, iya ginpahayag nga nagdangat sa 25 ang patay bangud sa rabies.
Suno kay Dr. Lumauag, nagadangat sa masobra tunga sa milyon ang populasyon sang mga ido sa bug-os nga rehiyon sang 2019.
Dugang pa sang natungdan, nagataas ang kaso sang rabies sa rehiyon bangud sa kakulang sa vaccine.
Subong nga 2020, may P8 million nga pondo nga ginpain ang Department of Budget and Management (DBM) agud ibakal sang vaccine.
Kaangot sini, nagpanawagan man si Dr. Lumauag sa mga local government units (LGUs) sa pagbulig sa Bureau of Animal Industry agud magbakal sang rabies vaccine.
Nahibaluan nga madamo sang pamaagi agud malikawan ang rabies kag ang nangin kontrobersyal nga ‘mercy killing’ sa mga layaw nga ido.
Ini amo ang TNVR nga nagakahulugan: T para sa Trap ukon pagdakop sang stray dogs; N para sa Neuter ukon pagkapon agud indi na ang mga ini magbata; V para sa Vaccine ukon pagbakuna sang anti rabies vaccine; kag, R para sa Return ukon liwat nga pagbuya sang mga ido sa ila teritoryo ukon habitat.
May mga grupo man nga mga naga-adoptar sang ido kaangay sang Animal Welfare Association kag nagasagod sang mga ini agud indi na makatuga sang halit kag perwisyo sa mga dalanon.
