ILOILO CITY- Nagpaandam ang Local Disaster Risk Reduction and Management Office sang Dingle, Iloilo sa mga residente sang 22 ka mga flood prone kag tatlo ka landslide prone nga mga barangay sa banwa.
Ang 22 ka mga flood prone barangays base sa data sang Local Disaster Risk Reduction and Management Office amo ang Abangay, Pandan, Bongloy, Tanghawan, Siniba-an, Dawis, Poblacion, San Matias, Licu-an, Nazuni, Tulatula-an, Calicuang, Ginalinan Nuevo, Matangharon, Camambugan, Ilajas, Tinocuan, Tabugon, Libo-o, Moroboro, Lincud kag Namatay.
Samtang ang Barangays Potolan, Agtatacay kag Tulatulaan amo ang landslide prone.
Sa interview sang Bombo Radyo kay Mr. Adje Calanao, Head sang Local Disaster Risk Reduction and Management Office, iya ginpahayag nga sa subong yara pa sa normal ang water level sang Jalaur Dam, amo man sa mga suba nga yara sa Calinog, Passi City , Dueñas kag San Enrique.
Ginasiguro naman ni Calanao nga gilayon nga ma-update ang pumuluyo ilabi na sa lebel sang tubig sa kasubaan.
Wala pa sang abiso nga mag-evacuate ang mga pumuluyo bangud ginakabig pa nga safe ang mga lugar apang mas maayo nga indi na paghulaton pa nga magtaas ang tubig sa suba sa baylo magpatigayon sang preemptive measures pinaagi sa pag-evacuate sang timprano.
