ILOILO CITY – Dakop sa ginpatigayun nga buy bust operation sang Regional Drug Enforcement Unit (RDEU) ang tatlo ka mga babayi sa Plaza Libertad, Iloilo City.
Ang mga subject ang ginkilala nga sanday Lorasel Celis sang San Roque, Barotac Viejo, Iloilo, Hannah Lemor, 34, sang Montinola, Sta. Barbara, Iloilo kag ang main subject nga si Elma Crisosto nga live in partner ni Marion Dorban nga nadakpan sa ginpatigayun nga buy bust operation sa Alta Tierra Village, Jaro, Iloilo City sang nagligad nga Mayo 21 kaupod si Racid Divinagracia.
Sa interview sang Bombo Radyo kay Police Lt. Col. Vincent Pendon, team leader sang RDEU, iya ginpahayag nga duha tubtob tatlo na nila ka semana nga ginabantayan ang tatlo.
Suno pa kay Pendon, kalabanan sa mga parokyano sang tatlo amo ang mga nagahampang sa binggohan sa syudad kag probinsya sang Iloilo.
Pahayag pa ni Pendon, makusog ang buot sang tatlo nga magbaligya sang iligal nga droga sa diin ang supply ang ginakuha mismo sa Bacolod City.
Ginpanginwala naman sang tatlo ang akusasyon nga sila ang nagabaligya kag sa baylo, gin-ako nga nagagamit lang sila sang illegal drugs.
Nahibaluan nga nakuhaan sang 11 ka sachet sang illegal drugs ang mga subject lakip na ang buy bust money nga P5,000.
