Nagpanawagan si Mamamayang Liberal Party-list Rep. Leila de Lima nga imbestigaran gid sang maayo ang nangin military operation sa Toboso, Negros Occidental, kun sa diin patay gid ang 19 ka mga indibidwal, lakip na ang isa ka estudyante kag isa man ka community Journalist sa insidente nga natabo sang Abril 19.
Ginkilala ang mga ini kanday RJ Nichole Ledesma, journalist kag isa cultural worker; samtang isa man sa mga biktima amo si Alyssa Alano sang University of the Philippines, student leader kag peasant organizer.
Suno kay Rep. Delima, kinahanglan gid ini nga imbestigaran bangud sa mataas nga numero sang mga napatay sa nasambit nga operasyon kun sa diin madamo man ang mga alegasyon nga madamo ang naulamid lang nga mga sibilyan, mangunguma, kag human rights advocates.
Pahayag ni De Lima, maga-file man sya sang resolution sa House of Representatives agud mapadasig nga maimbestirahan ang natabo.
Pahayag man sang kongresista nga kaangay ini sang engkwentro sa Sagay City sang 2018 kun sa diin pila man ka mga aktibista kag mangunguma ang ginpatay.
Sa bahin sang mga soldado, ila ginpahayag nga indi dapat pag-iselebrar ang kamatayon sang mga indibidwal nga suspected members sang NPA apang ginakbig nila ini nga isa ka “hustisya” para sa mga sibilyan nga nagkalamatay sa Negros sang Enero 2024 matapos ang mga pagpamahog sang mga ini sa mga pumuluyo sang lugar.
