Ginkumpirma sang Department of Foreign Affairs nga tatlo pa ka mga Pilipino sa luwas sang pungsod ang nagpositibo sa COVID-19.
Bangud diri, nagsaka na sa 654 ang kabilugan nga numero sang mga Pilipino sa luwas sang pungsod nga apektado sang makamamatay nga virus.
Suno sa Department of Foreign Affairs, wala naman sang nangin pagbag-o sa numero sang mga nagkalamatay kag naka recover.
Sa subong nagapabilin nga 84 ang Pilipino nga nagkalamatay sa nasambit nga virus samtang 188 naman ang naka recover.
Dugang pa sang Department of Foreign Affairs, 40 ka mga pungsod na sa bilog nga kalibutan ang naka record sang mga Pilipino nga natapikan sang COVID-19.
Ang Asia-Pacific region ang may pinakadamo nga numero sang mga Pilipino nga nagpositibo sa nasambit nga balatian nga nagdangat na sa 226 kag ginasundan sang Europa nga may 220 ka kaso, ika-tatlo amo ang Estados Unidos nga may 125 kag Middle East nga may 80.
