ILOILO CITY – Nag-abot sa Pilipinas ang masobra 390,000 doses sang bivalent coronavirus disease 2019 vaccines nga gin-donate sang Lithuania.
Ang vaccine doses ang ginbaton sang mga opisyal sang gobyerno nga ginpamunuan ni Department of Health Assistant Secretary Leonita Gorgolon, sa isa ka seremonya sa Ninoy Aquino International Airport, nga gintambungan man sang Honorary Consul of the Republic of Lithuania, Julia Netta Vildzius Peña kag Deputy Head of Mission of the European Union to the Philippines, Dr. Ana-Isabel Sanchez-Ruiz.
Ang bivalent vaccines ang nagahatag sang proteksyon batuk sa orihinal nga strain sang viruc nga SARS-CoV-2, kag Omicron subvariants BA.4 kag BA.5, suno sa Department of Health.
Sang Agosto 2022, nagsugod sa pagnegosyar ang health agency agud nga makakuha sang suplay sang bivalent vaccines.
Sang Enero 2023, nagtanyag ang Lithuania nga magdonar sang bakuna.
Magluwas sa sini nga donasyon, ang Department of Health ang nagapakig-angut man sa COVAX Facility may kaangtanan sa pagkuha sang dugang nga doses sang bivalent vaccines para sa publiko.
Sa idalom sang pagsulundan, ang mga healthcare workers, senior citizens, individuals with comorbidities, kag ang mga immunocompromised ang makakuha sang priority access sa gindonar nga bivalent vaccines.
Mahimo nga mabakunahan ang isa ka indibidwal sang bivalent vaccines pagkatapos sang indi magnubo sa apat tubtob anum ka bulan pagkatapos sang katapusan nga booster vaccination.
