Nag-guwa sa survey sang Pulse Asia nga gin-komisyon ni Senator Sherwin Gatchalian nga 69% sang mga Pinoy ang pabor sa Reserved Officer Training Corps (ROTC) program para sa senior high school students.
Chairman sang Basic Education Committee sa Senado si Gatchalian kag isa man sa nagaduso sa mandatory ROTC sa eskwelahan.
Ginpatigayon ang survey halin sang Hunyo 24-27.
1,200 ang respondents nga ginpamangkot kun sugot ukon indi sugot sa proposal nga i-implementar ang ROTC program sa senior high school students.
Sa resulta, 69% ang nagpasugot, 16% ang wala nagpasugot, samtang 15% naman ang indi pa maka-desisyon sa amo nga isyu.
Sa resulta sang survey, 71% sang respondents sa National Capital Region, 67% sa Balance Luzon;78% sa Visayas, kag 64% sa Mindanao ang lunsay nagpahayag nga pabor diri.
Sa amo man nga survey, 71% sang respondents sa Classes ABCD ang nagapabor sa pagbalik sang ROTC program sa Grades 11 kag 12 samtang 54% naman halin sa Class E ang pabor man sa proposal.
Matandaan nga sa State of the Nation Address (SONA), ginpahayag ni President Ferdinand Marcos Jr. nga isa ang mandatory ROTC program sa senior high school students sa priority measures sang iya nga administrasyon. ##
