Hirit sang Chinese businessman nga aregluhon ang pagtampok sa isa ka creek sa Iloilo, ginbasura sang city gov't

Ginbasura sang Iloilo City government ang sulat nga ginpadala sang kampo sang Chinese businessman nga si Andrew Ong nga nagtampok sa Dungon Creek.
Ginpadala ang sulat kay city administrator Atty. Hernando Galvez gikan kay Atty. Christopher Espera nga nagarepresentar kay Ong.
Sabat ini sa demand letter nga nagapakuha sang tinampok sang Chinese businessman sa Dungon Creek.
Suno sa sulat, luyag ni Ong nga magpakigsapol liwat kay Galvez agud ma-istoryahan kun paano maresolba ang iya nga claims kag nagahinyo man nga indi anay pagdayunon ang drastic action sang syudad.
Ginpahayag ni Galvez, nga matapos niya nabaton ang sulat, gilayon ini nga nagpakig-angot sa kampo ni Ong kag ginpahibalo nga ila ginapanindugan ang pagpakuha sang tinampok nga balas kag bato sa Dungon creek.
Pahayag pa ni Galvez, ihatag sang syudad ang 30 ka adlaw nga magatapos sa Maso 2, nga una na gin-promisa ni Ong nga iya kuhaon ang tinampok.
Dugang pa sini, ginmanduan na ang City Environment and Natural Resources Office nga magpatigayon sang inspection sa Dungon Creek sa Marso 2 kun nagsunod ang Chinese businessman sa iya ginpangako.