Hugot ang ginapatuman nga seguridad sa pagpanguna sang Commission on Elections (Comelec) sa warehouse sa Barangay Lapayon, Leganes, Iloilo sa diin natago ang mga balota nga gamiton para sa May 13, 2019 elections.
Suno kay Provincial Comelec Supervisor Atty. Roberto Salazar, ang nasambit nga mga balota ang ginabantayan sang Philippine National Police sa sulod sang 24 oras.
Magluwas sini, may mga ginpahamtang man nga mga security cameras sa warehouse.
Kabug-usan nga 1.5 million nga mga official ballot ang ginpain para sa Syudad kag Probinsya sang Iloilo.
Ang nasambit nga mga balota ang ipanagtag sa mga municipal kag city treasurers’ office antes ang Mayo 8.
