Wala ginakabig sang Police Regional Office (PRO)-6 nga isa ka mistaken identity ang natabo nga pag-aresto kag gilayon man nga paghilway kay Baltasar Cresosto Saldo,54 anyos sang Brgy. Sto. Angel, Dumalag, Capiz nga ginatudlo nga mataas nga lider sang Communist Party of the Philippines -New People’s Army (CPP-NPA).
Sa interview sang Bombo Radyo Iloilo kay Lt. Col. Joem Malong,tagpamaba sang PRO-6, iya ginpahayag nga indi pa sila makahimo sang konklusyon nga nasal-an lang si Saldo bilang si Virgilio Paragan alyas Hassan, anay Commanding Officer sang Roger Mahinay Command, Komiteng Rehiyon-Negros sang (CPP-NPA) nga may kaso nga murder kag frsutrated murder.
Suno kay Malong, may yara sang testigo batok kay Saldo nga nagatudlo nga siya si Virgilio Paragan gani kwestiyonable sa gihapon ang iya identity kag kinahanglan pa nila nga makakita sang iban nga testigo agud makumpirma kun si Saldo amo gid man si alyas Hassan.
Samtang ginpahayag ni Malong nga matapos ginhilway si Saldo, mga miembro man sang kapulisan ang nagdul-ong sa iya sa ila puluy-an sa Dumalag,Capiz.
Pananglitan naman nga mapamatud-an nga peke ang mga pahayag sang testigo batok kay Saldo, ang testigo ang ila pasakaan sang kaso nga perjury.
Matandaan nga ginpabugal pa ni PRO-6 Director Police Brigadier Gen. John Bulalacao bilang major accomplishment ang pagkadakop kay Saldo antes nadiskubrehan nga isa lamang ini gali ka kaso sang ginapahayag mistaken identity.
