ILOILO CITY– Ginatos nga mga pasahero ang stranded sa Parola Wharf pagkatapos nga ginkansela ang biyahe sang pump boat kaina sang aga bangud sa malain nga tiyempo kag mamadlos nga hangin.
Ini ang kabahin sang pagsunod sang Philippine Coast Guard sa ginpanaog nga memorandum sang Maritime Industry Authority nga indi pagpasugtan nga maglayag ang mga magagmay nga sakayang pandagat sa tion nga maglapaw sa Force 3 sang Beaufort Scale nga 7 tubtob 10 knots kag maglapaw sa 0.5 meters ang wave height.
Sa interview sang Bombo Radyo kay Rhea Tijing, ticket seller sa Parola Wharf, iya ginpahayag nga ang mga nga nakabakal na sang ticket ang mahimo makahulat kun san-o liwat magabalik ang biyahe bangud nga wala pa nakolekta ang bayad kag agud nga indi mabudlayan ang pag-refund.
Sa pihak sini, ang mga nagadali nga pasahero ang mahimo man nga makasakay ang mga pasahero sa fast craft kag sa mas dalagko nga barko nga padayon nga nagabiyahe Iloilo-Guimaras vice versa.
