ILOILO CITY- Mahimo nga mapasakaan na sang pormal nga reklamo sa labing madali nga tinion ang mga barangay officials sa syudad sang Iloilo nga wala nagapatukod sang Material Recovery Facility bilang pagtuman sa RA 9003 ukon Ecological Solid Waste Management Act.
Sa interview sang Bombo Radyo kay anay Iloilo City Councilor Joshua Alim, iya ginpahayag nga ginahanda na nila ang mga dokumento upod sa Task Force Kasanag (TFK), isa ka anti-crime task force nga nakarehistro sa Securities and Exchange Commission.
Suno kay Alim, naistorya na niya ang national commander sang Task Force Kasanag nga si John Chiong kag ginpahayag nga seryoso sila sa pagpasaka sang kaso batok sa mga barangay officials.
Ginpahayag ni Alim nga subong nga semana, target nila nga mapasaka na ang reklamo sa Ombudsman.
Samtang, ginakabig naman ni Alim nga usik lang sa kwarta ang Lakbay -Aral sang mga barangay officials padulong sa Bataan kag Olongapo City.
Suno kay Alim, pila ka tuig na nga ginapatigayon ang lakbay-aral apang nagakapaslawan man ang mga opisyal sang mga barangay nga ipatuman sa Syudad sang Iloilo ang mga best practices sa mga lugar nga ila ginapadulungan.
