ILOILO– Ginpang amat-amat na sang mga flower vendors ka himos ang ila mga baligyaan sa tubang sang Iloilo Central Market.
Sa interview sang Bombo Radyo kay Novie Alaban Presidente sang Flower Vendors Association, iya ginpahayag nga wala na sila sang mahimo kag sila nalang mismo ang nagpang amat-amat nga himos kag nag guba sang ila mga baligyaan.
Nahibaluan nga ginpahalin ang mga flower vendors sa daan nila nga mga pwesto sa gwa kabaylo sang pagbutang sa ila sa sulod sang Iloilo Central Market.
Ini man ang pagsunod sa nagapadayon nga Oplan Hawan sa syudad nga ginmando ni Presidente Rodrigo Duterte.
Suno kay Alaban, nagakabalaka sila sa mangin sitwasyon nila sa sulod sang merkado bangud indi organisado ang lugar nga pahamtangan kag indi na ini madali makita sang mga tawo.
Dugang sang natungdan, naga laom sila nga mahatagan sang konsiderasyon ni Iloilo City Mayor Jerry Trenas nga hatagan sila sang isa ka metro nga lugar sa tubang sang Central Market kun sa diin nila ipahamtang ang mga gagmay nila nga mga baligya.
