ILOILO– Tunga ang opinyon sang mga sidewalk vendors may kaangtanan sa pagpahalin sa ila sa mga sidewalk sa syudad kag pagpahalin sa ila sa bag-o nga lugar.
Sa ginpatigayon nga Association meeting sang mga sidewalk vendors ginpahayag ni Alyas Manny isa ka manugbaligya sa sidewalk nga luyag nila magpatigayon sang hublag protesta agud mapa lab-ot kay Presidente Rodrigo Duterte ang sitwasyon nila subong.
Nahibaluan nga nag patigayon sang pagsinapol ang mga sidewalk vendors kahapon nga adlaw agud mahitso ang mga tikang nga ila himuon kag makapaayo sa tanan.
Samtang wala naman naga ugyon Jimmy Durado Federation President sang Iloilo City Sidewalk Vendors Association sa plano nga pagpatigayon sang hublag protesta sang iban nga mga vendors.
Suno kay Durado indi kinahanglan nga mangin bayolente kag mag lab-ot sa pagpatigayon sang protesta.
Dugang sang natungdan kinahanglan nalang nila subong nga magbuliganay nga mangin maayo kag malimpyo ang lugar nga ila halinan bangud wala na ini sang problema.
Apang naga hingyo man sa gihapon ang mga vendors kay Iloilo City Mayor Jerry Trenas sang konsiderasyon nga hatagan sila sang gamay nga tiyempo agud matapos nila tanan ang mga kinahanglan sa paghalin nila sa bag-o nga lugar nga pahamtangan sang ila mga baligya.
