ILOILO– Padayon ang monitoring kag ang pagrescue sa mga badjao nga naga liho-liho sa syudad sang Iloilo.
Sa interview sang Bombo Radyo kay Hector Alejano, administrative aid sa City Mayor’s Office, iya ginpahayag nga naglab-ot na sa masobra 100 ang mga bajao ang narescue.
Suno kay Alejano, sa bulig sang Department of Social Welfare and Development, ginasasupo ang mga narescue samtang ginahulat ang eroplano nga ginrequest sang Iloilo City Government sa Office of the Civil Defense nga amo ang sakyan sang mga badjao papauli sa Jolo, Sulu.
Gina tan-aw nila suno kay Alejano nga long term solution ang pagdul-ong pauli sa mga badjao sa Sulu.
Nagpakig-angot na sila suno kay Alejano sa Local Government Unit sang Jolo, Sulu agud mabuligan sa pagkontrol sang mga badjao.
Tuhoy naman sa pamangkot kun posible nga sa syudad na lang sang Iloilo patiniron ang mga bajao, ginpahayag ni Alejano nga indi ini mahimo bangud wala sang may matanyag nga relocation ang Iloilo City Government.
