ILOILO CITY- Ginaplanuhan pa lang sang barangay council sang Concepcion, Iloilo City Proper ang pagpatukod sang Material Recovery Facility sa ila lugar.
Sa interview sang Bombo Radyo kay Barangay kagawad Eduardo Jorda, iya ginpahayag nga may yara man sila sang Material Recovery Facility sadto apang madugay na ini nga naguba.
Sa subong suno kay Jorda, nagamato-mato nalang haboy sang ila basura ang mga pumuluyo sa kada tion nga nagakolekta ang truck sang JS Layson.
Apang, gin-ako ni Jorda nga wala ginasegregate sang pumuluyo ang ila basura.
Tinguhaan naman nila suno sa kagawad nga makapangita sang lugar nga pahamtangan sang Material Recovery Facility.
Wala naman nakaupod si Jorda sa ginpatigayon nga Lakbay-Aral sang mga barangay officials sang syudad sang Setyembre 3-7, 2019 sa Olongapo Kag Bataan.
Suno sa iya,wala man siya ginhagad nga mag-upod apang handa man kuntani siya nga maglakat kun ginhagad bangud siya ang chairman sang Committee on Environment sa barangay council.
Samtang, ginaproblema sa gihapon sang barangay ang mga obstruction sa dalanon apisar nga nakapatigayon na sang clearing operation ang Oplan Hawan sa ila lugar.
Suno kay Jorda, kalabanan nga nagatuga sang obstruction amo ang on-road parking.
