ILOILO CITY- Wala napunggan ni Hon. Judge Daniel Antonio Gerardo S. Amular nga magtaas ang tingog kadungan sang pagsaway sa Panay Electric Company (PECO) kag More Electric and Power Corporation nga respetuhon ang ginpagwa nga gag order sang korte.
Ini ang kadungan sa ginpatigayon nga expropriation hearing sa diin ginahingyo sang More Power nga kuhaon ang tanan nga mga assets sang Panay Electric Company .
Ang gag order ang may katuyuan nga makontrol ang publicity kag maprotektahan ang ‘right to a fair trial”.
Ang More Power nga amo ang plaintiff ang gintiglawas sang ila legal counsel nga si Atty. Hector Teodosio samtang ang Panay Electric Company naman nga defendant ang gintiglawas sang DIVINA Law.
Sa hearing kaina, ginpahayag ni Atty. Teodosio nga wala nagasunod sa gag order ang Panay Electric Company bangud padayon sila sa gihapon sa pagpa interview sa media.
Gintumod sini ang nangin pahayag ni Mr. Marcelo Cacho, administrative manager sang Panay Electric Company sa diin naghatag ini sang kumento tuhoy sa pag deny sang Korte Suprema sa petition for a temporary restraining order kag writ of preliminary injunction batok sa ruling sang Mandaluyong City Regional Trial Court Branch 209 nga nagadeklarar sang duha ka provision sang franchise law sang power firm nga unconstitutional.
Ginbalikan man ni Atty Teodosio ang ginhimo nga pagsaway ni Judge Amular sa iya kliyente nga si Mr. Roel Castro, presidente kag chief executive officer sang MORE bangud sa pagpa interview sini sa media.
Nagsabat naman si Jon Mikel Lorenzo Afzelius, communications officer sang Panay Electric Company kag nagpasalig nga respetuhon ang gag order.
Ginpahayag man ni Judge Amular nga ang mga media ang sobra pa sa mga abogado sa pag usisa kag pag imbestigar sa mga kaso kaangay na lang sang nasambit nga expropriation hearing.
Ginpasalig man sang hukom nga tun-an sini kag panumduman sang maayo ang iya mangin desisyon kadungan sang paghingyo sa More Power kag Panay Electric Company nga respetuhon ang iya mangin desisyon nga para sa kaayuhan sang mga pumuluyo sang Syudad sang Iloilo.
Bwas ipatawag naman liwat ni Judge Amular ang mga opisyal sang Panay Electric Company kag More Power.
