ILOILO CITY – Indi pa makahatag sang resulta ang Philippine Coast Guard sa imbestigasyon sa nagluntad nga Iloilo Strait Tragedy sang Agosto 3.
Sa interview sang Bombo Radyo kay Vice Admiral Joel Garcia, Commandant sang Philippine Coast Guard, iya ginpahayag nga indi pa niya masabat ang tuhoy sa imbestigasyon sa nasambit nga insidente bangud indi siya kabahin sang investigating team kag ang Maritime Industry Authority na ang naga-uyat sang imbestigasyon.
Suno kay Garcia, indi man niya luyag nga maghatag sang pahayag may kaangtanan sa nasambit nga imbestigasyon bangud mahimo nga magtuga ini sang negatibo nga epekto.
Ginapaboran naman ni Garcia ang rekomendasyon sang Martime Industry Authority nga indi paghumlad sang trapal sa pump boat bangud ini ang ginatudlo nga rason kun nga-a madamo ang napatay sa nagluntad nga trahedya.
Nagakadapat man nga islan ang style sang mga pump boats nga nagasunod sa desinyo nga ginagamit sa bilog nga pungsod.
