ILOILO CITY – Naglab-ot sa 32 ka mga motorista ang nadakpan nga nagalapas sa Anti-Modified Muffler Ordinance sa syudad sang Iloilo.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga matapos ang isa ka bulan nga pagpatuman sang nasambit nga ordinansa, madamo sa gihapon ang mga nagkaladakpan.
May kaangatanan naman sa traffic enforcer nga nadakpan nga nagadala sang open type nga motorsiklo, ginpahayag ni Conlu nga kumpirmado nga personnel Public Safety and Transportation Management Office.
Suno kay Conlu, sa tion nga mapamatud-an nga naglapas sa pagsulundan sang nasambit nga traffic enforcer, pagahatagan ini sang suspension nga magalawig sang isa ka semana tubtob isa ka bulan.
Samtang, ginpahayag ni Conlu nga madamu sa gihapon ang mga nagalapas sa traffic rules and regulations matapos ang ginpatigayon nga one time bigtime operation nga ginpangunahan sang Land Transportation Office.
Suno kay Conlu, kalabanan sa violations amo nga wala sang lisensya ukon student permit lang ang dala sang driver, wala sang dala nga OR/CR ukon Official Receipt ukon Certificate of Registration, wala sang plate number kag gindakop man ang mga nagabiyahe sang e-bike.
Samtang may kaangtanan naman sa ginaduso ni Iloilo 3rd District Cong. Lorenz Defensor nga pagpatigayon sang 3-4 hours mandatory re-education para sa mga nagakuha sang lisensya, ginpahayag ni Conlu nga pabor siya bangud kalabanan sa mga motorista ang wala sang disiplina.
Madamo man ang may yara sang lisensya ang wala nahaibalo kag nakahangop sa basic traffic rules and regulations.
