ILOILO – Ginpanginwala sang Police Regional Office 6 ang impormasyon nga may yara sang promo ang mga durugista sa pagbaligya sang ilegal nga droga.
Sa interview sang Bombo Radyo kay Pol Lt Col Joem Malong, tagapamaba sang Police Regional Office 6 iya ginpahayag nga indi matuod ang mga nasambit nga impormasyon lakip naman ang isyu nga may yara sang buy 1 take nga droga nga mahimo mabakal sa mga durugista sa Iloilo.
Suno kay Malong, wala pa sang reported case nga maga angot sa mga nasambit nga impormasyon sa pagmatuod mahal sa gihapon ang baklanay sang ilegal nga droga diri sa Iloilo kag ginakulang naman ang supply sang droga sa Western Visayas kun sa diin nagabalor sang P8-15,000 ang isa ka gramo samtang sa Bacolod kag Negros naman ginabanta sa P6-8,000 ang balor sang ilegal nga droga kada gramo.
Dugang sang natungdan, positibo para sa kapulisan ang mga nasambit nga impormasyon bangud nagapamatuod ini nga indi na mangin mabudlay para sa ila nga mangdakop sang mga durugista bangud wala na sang posible nga mga buyers.
Apang ginalauman naman sang PRO 6 nga posible may yara naman sang magsulod nga mga durugista sa Iloilo ilabi na subong nga Dinagyang.
Nagpasalig si Malong nga padayon nila nga monitor nga ginakumpirma ang nasambit nga isyu agud gilayon ini nga matapna.
