ILOILO – Buhi sa gihapon ang paglaum sang iloy sang duha ka mga kabataan nga nasapwan patay kaupod ang ila amay sa paglaslas sang bagyong Ursula sa banwa sang Batad, Iloilo.
Ang iya mga kabataan ginkilala nga sanday Mimi de Asis,Yanyan de Asis sang Brgy. Pasayan, Batad, Iloilo samtang ang ila nga amay naman ang ginkilala nga si Roel De Asis.
Padayon naman nga ginapangita ang isa pa niya ka bata nga si Muymuy matapos ang paglaslas sang bagyo
Sa interview sang Bombo Radyo kay Andrea De Asis iloy sang mga biktima, iya ginpahayag naka istoryahanay pa sila kahapon sang iya bana kag mga kabataan paagi sa text message kun sa diin iya na notisyar nga maluya ini.
Suno kay De Asis, nagbakasyon lang kun tani ang iya mga kabataan sa Batad apang nadesisyunan nila nga magtenir sang madugay bangud man sa pagtaliwan sang ila nga lolo nga amay sang iya bana.
Nahibaluan nga nakatalana kun tani nga mapadulong si De Asis sa Kuwait subong nga adlaw agud mag trabaho apang iya na nga ginkansela ang iya kontrata kag nagdesisyon nga magpauli nalang sa Batad agud personal mismo nga makita ang iya mga himata.
Sa pihak sini, apisar nga tuman kasakit ang natabo sa iya nga pamilya buhi sa gihapona ng paglaum ni De Asis bilang isa ka iloy nga buhi pa kag nakasalbar ang iya bata nga si Muymuy.
Nagapabilin naman nga mabaskog si De Asis para sa duha pa niya ka mga kabataan nga nabilin.
