ILOILO – Ginbisita sang Committee on Judges kag Tribes and Artistic Committee ang tanan nga mga tribu nga magapasakop sa Opening Salvo sang Dinagyang 2020 subong nga biyernes.
Sa interview sang Bombo Radyo kay Elvert Bañares, miyembro sang Artistic Committee, chairman sang Committee on Judges kag Souvenir Program iya ginpahayag nga sa ila pagbisita kag pagtsekyar sa performances sang mga tribu isa lang ang mapasalig niya sa mga Ilonggo kag mga turista nga magapadulong sa Iloilo agud saksihan ang Opening Salvo sang Dinagyang 2020 amo ang mangin matahom kag engrande ang pagsaulog sini kun ipaanggid sa gintalikdan nga mga tinuig.
Suno kay Bañares, maga sentro sa kultura sang Western Visayas ang performance sang walo ka tribu sa diin igapresentar nila ang endemic kag endangered species sang probinsya.
Dugang sang natungdan, subong palang ginapasalamatan na niya ang tanan nga yara sa likod sang Dinagyang Festival subong nga tuig ilabi na ang mga manunudlo, kag mga estudyante nga amo ang naga baka-baka agud makahatag sang matahom nga mga performances para sa mga tumalan aw.
