ILOILO – Nagpasalig ang Association of Taxi Operators of Panay nga sundon ang Memorandum Circular 2020-005 sang Land Transportation Franchising and Regulatory Board nga nagamandu sa drivers sang Public Utility Vehicle nga magsuksok sang face masks samtang nagabiyahe agud indi malatnan sang Novel Coronavirus.
Sa interview sang Bombo Radyo kay Perfecto Yap, presidente sang Association of Taxi Operators of Panay, iya ginapahayag nga antes nagpaguwa sang memorandum ang Land Transportation Franchising and Regulatory Board, nakapatigayon na sila sang sanitation sa kada unit sang taxi agud nga indi maglapta ang virus.
Suno kay Yap, magapahamtang man sila sang disinfectant kag sanitizer indi lang para sa driver kundi para man sa mga pasahero.
Nagpawagan naman ang natungdan sa taxi drivers kag operators nga siguraduhon nga sundon ang mga pagsulundan lakip man ang memorandum sang Land Transportation Franchising and Regulatory Board agud malikawan ang Novel Coronavirus.
