ILOILO CITY-Natalana na nga igalunsar sang Iloilo Provincial Government ang Limpyo Iloilo.
Sa interview sang Bombo Radyo kay Iloilo Governor Arthur Defensor jr, iya ginpahayag nga patigayunon ang launching sang Limpyo Iloilo nga isa ka province-wide clean up sa Pebrero 21,alas kwatro sa hapon nga pangunahan sang Iloilo Provincial Government.
Suno kay Governor Defensor, katuyuan sang programa nga malimpyuhan ang probinsya para sa turismo kag para man sa ikaayong lawas sang pumuluyo ilabi na sa pagbato sa makamamatay nga dengue hemorrhagic fever.
Ginpahayag sang gobernador nga isa ini ka convergence clean-up nga bululigan sang mga ahensya sang gobyerno kaangay sang Department of Education, Department of Environment and Natural Resources, Department of Interior and Local Government, Department of Public Works and Highways, mga non-government organizations, people’s organizations kag mga local government units halin sa probinsya panaog sa barangay.
Suno pa sa gobernador, antes ang launching, kinahanglan nga nakapili na ang banwa kag mga barangay sang area nga limpyuhan sa diin may briefing man nga patigayunon sa adlaw mismo sang launching sa alas tres sa hapon.
Dugang pa sang gobernador,pagkatapos sang launching, may patigayunon man nga pag-audit kag tutukan man ang pag-sustain sang programa sa diin sipad-siparon ang tanan nga layi kag ordinansa angot sa solid waste management.
Gina-imbitar naman sang gobernador ang tanan nga pumuluyo nga buylugan ang programa.
