ILOILO – Wala sang pagpangduha-duha nga gin-ako sang tatlo ka suspek sa pagpatay sa 20 anyos nga lalaki nga nasapwan nga wala na sang kabuhi sa Tumagbok Bridge sa Miag-ao, Iloilo ang krimen nga ila ginhimo.
Ang biktima ginkilala nga si Kevin Christian Soriano ukon alyas Boy-boy.
Samtang ang mga suspek naman amo sanday Rene Boy Nicar Sisdeno, 31 anyos, iya utod nga si Renesto, 25 anyos, kag ang abyan nga si alyas Bibi, 16 anyos.
Sa interview sang Bombo Radyo kay Renesto Sisdeno iya ginpahayag nga indi nila kun tani hunggod nga patyon si Soriano bangud plano lang nila nga tripingan ini paagi sa paglampos sang dos por dos.
Suno kay Sisdeno, wala nila na antesepar nga matam-an ini kag mangin tunaan sang kamatayon sang biktima.
Dugang sang natungdan, matapos lampusan sang dos por dos ila pa ini nga ginlabo, ginsulod sa sako kag ginsakay sa wheelbarrow kag gindala sa taytay kag didto na ginhaboy.
Nagapati naman ang kapulisan nga wala sang tuyo nga magpalagyo ang mga suspek bangud nagbalik pa sila sa ila tagsa ka mga trabaho pagkatapos sang krimen.
