ILOILO CITY – Nagpatigayon sang ika-labing una nga pagsinapol ang Tricycle Task Force sa syudad sang Iloilo nga ginpangunahan ni Iloilo City Mayor Jerry Treñas.
Sa interview sang Bombo Radyo kay Jeck Conlu, pinuno sang Public Safety Transportation and Management Offie kag miyembro sang Tricycle Task Force iya ginpahayag nga gin istoryahan sa ginpatigayon nga pagsinapol ang mga pagsulundan sa memorandum nga ginhatag sang Department of Interior and Local Government may kaangtanan sa pagpatukod sang Tricycle Task Force sa kada Local Government Unit.
Suno kay Conlu, gin review man ang mga ruta kag prangkisa nga gin isyu kag gin aprubahan sang Iloilo City Council sa mga tricycle owners.
Dugang sang natungdan, ang masunod nga ubrahon sang task force amo ang tan-awon ang mga ruta nga mahimo mahatag sa mga tricycle kag dugangan ini sa sulod sang 30 ka adlaw nga gin hatag sang Department of Interior and Local Government.
Ginatan-aw man nila nga imbitaron ang Department of Public Works and Highways sa masunod nila nga pagsinapol bangud sila lang ang makahambal kun diin ang national roads kag national highways.
Luyag naman athagon sang Tricycle Task Force sa mga pumuluyo nga indi anay sila makahatag sang bag-o nga prangkisa bangud temporaryo ini nga ginpa-untat.
Ginahatagan naman sang konsiderasyon ang mga nahatagan na sang prangkisa antes pa man ginpapanaog sang Department of Interior and Local Government ang memorandum.
Gin-athag man sang task force nga wala sila nagapangdakop sang mga tricyle nga may prangkisa, magluwas lang sa mga colorum kag wala sang permit.
