ILOILO CITY – Magapatigayon sang joint committee hearing ang Committee on Disaster Risk Reduction and Management kag Committee on Public Order and Safety agud imbestigaran sa nagluntad nga road mishap sa Alimodian sa diin napatay ang apat ka miyembro sang 601st Regional Mobile Force Batallion.
Sa interview sang Bombo Rady kay 4th District Board Member kag Committee Chairman sang Committee on Disaster Risk Reduction and Management Rolly Distura iya ginpahayag nga paagi sa patigayunon nila nga imbestigasyon, luyag nila nga maathagan kun ano ang matuod nga kabangdanan sang nagluntad nga aksidente.
May yara man sila sang paga imbitaron nga mga opisyal nagikan sa nagkalain-lain nga ahensya sang gobyerno nga mahimo makabulig sa pagpa-athag sang natabo nga aksidente.
Suno kay Distura luyag nila nga mahibaluan ang kabangdanan agud mahatagan sang solusyon kag map un-an kun ano man ang kakulangan agud malikawan nga matabo ini liwat.
Dugang sang natungdan, luyag man nila mahatagan sang igtalupangod ang nagluntad nga aksidente bangud nagapamatuod lang ini nga madamo sang kakulangan ang mga kapulisan ilabi na sang mga gamit kag salakyan.
Bangud diri, luyag ni Distura nga iduso ang resolusyon nga hatagan bulig pinansyal ang mga katapo sang kapulisan nga mapaslawan samtang naga trabaho.
