JAPAN – Gindugok sa gihapon sang madamo nga tawo ang 2020 Tokyo Olympics cauldron sa naaminhan-nasidlangan nga bahin sang Japan sa pihak sang pagpamahog sang Coronavirus Disease 2019.
Suno sa mga organaizers, naglab-ot sa 50,000 katawo ang naghulat sang pila ka oras sa 500 ka metro nga pila makit-an lang ang Olympic flame nga nahamtang sa Sendai station sa Miyagi.
Ang nasambit nga lugar ang napilian agud mangin kahabin sang ‘Recovery Olympics’ nga nagapakita sang pagtibawas sang rehiyon nagikan sa tsunami, linog kag nuclear meltdown nga naghalit sa ila lugar sang 2011.
Nagpaandam naman ang mga organizers nga posible suspindehon nila ang viewing sang event kun padayon nga magdamo ang mga tumalan-aw.
Nahibaluan nga magasugod ang nationwide torch relay sa Marso 26 sa Village sports complex sa Fukushima.
