THAILAND – Aprubado na sang gobyerno sang Thailand ang plano nga hatagan sang automatic nga visa extension ang tanan nga ilegal nga nagsulod sa pungsod agud malikawan ang pagdugok sang mga tawo sa immigration centers bangud man sa kahangawa sa COVID-19.
Madumduman nga ginpasirado na sang Thailand ang tanan nga borders lakip man ang pagban sa pagsulod sang mga dumuluong magluwas sa mga may yara sang working-permits.
Samtang ang mga dumuluong naman nga nagsulod sa Thailand antes pa man ginpatuman ang ban, may yara sang visa kag nakabaton sang visa on arrival ukon sa idalom sang visa waiver programs ang indi na kinahanglan pa nga magpadulong sa immigration centers agud palawigon ang ila nga pagtinir sa nasambit nga pungsod.
Mangin epektibo ang automatic visa extension tubtob Abril 30 kag mahimo pa nga ma extend kada bulan.
Nahibaluan nga sang nakaligad lang nga semana, gintugutan sang gobyerno sang Thailand nga magtinir sa pungsod ang mga migrant workers nga may yara sang manug expire na nga work permits kag indi na nila kinahanglan pa sang extensions tubtob mag bukas liwat ang mga borders.
