ILOILO CITY- Wala sang problema kay Iloilo City Mayor Jerry Treñas kun ibalik ang Enhanced Community Quarantine sa syudad sang Iloilo.
Ini matapos ang pag-anunsyo ni Presidential Spokesperson Atty. Harry Roque nga nalakip ang syudad sang Iloilo sa mga lugar nga magapabilin sa Enhanced Community Quarantine tubtub sa Mayo 15.
Sa interview sang Bombo Radyo kay Treñas, iya ginpahayag nga batunon kag sundon niya ang nasambit nga desisyon.
Suno kay Treñas, makapila ka beses nga nagtawag sa iya si Roque agud ipahibalo ang pabag-o bag-o nga desisyon sang Inter-Agency Task Force.
Ginpahayag ni Treñas nga wala siya nakahibalo kun ano ang ginbasehan sa pagbalik sang Enhanced Community Quarantine.
Ang sarang na lang nga mahimo sa subong suno sa alkalde amo ang pagpahimo sang dugang nga facemasks nga ipanghatag sa mga kabaranggayan.
