Liwat nga nagpanugyan ang National Task Force Against COVID-19 sa publiko nga mangin mapailubon kag padayon nga mag kooperar sa pagpanikasog sang gobyerno nga mabalik na sa ‘new normal’ ang pagpangabuhi sa tunga sang pandemic.
Suno kay National Task Force Against COVID-19 chief implementer Secretary Carlito Galvez, nagakadapat sa gihapon nga magpabilin sa ila tagsa ka mga panimalay ang publiko magluwas lang sa mga yara sa industriya nga nagbalik na sa operasyon kadungan sang pag implementar sang modified enhanced community quarantine sa pila ka mga lugar sugod sa Mayo 16.
Dugang sang natungdan, padayon ang pagpangita sang gobyerno sang paagi agud matapna ang paglapta sang Coronavirus Disease 2019 (COVID-19) sa pungsod apisar nga nag amat-amat na bukas ang pila ka mga negosyo.
Kadungan sini, natalana nga mag-abot ang dugang pa nga 3milyon nga set sang Personal Protective Equipment sa masunod nga semana.
Santo sa pahayag ni Galvez, ang una nga delivery nga 250,000 ka set ang natalana nga mag-abot sa Mayo 18.
Dugang pa ni Galvez, may yara na sang gintalana nga P20 bilyon nga pondo ang gobyerno nga gamiton sa pagbakal sang dugang pa nga 11 milyon nga set sang Personal protective Equipments sa diin kada set ang makabig nga level 4 ang kwalidad kag nagabalor P1,800 kada isa.
