ILOILO CITY– Handa na nga magbyahe subong nga adlaw, ang iban pa nga units sang taxi sa syudad sang Iloilo.
Sa interview sang Bombo Radyo kay Perfecto Yap, Presidente sang Association of Taxi Operators in Panay, iya ginpahayag nga handa na ang dugang nga units sang taxi agud maghatag sang serbisyo sa mga pumuluyo.
Suno kay Yap, antes pa man magbyahe ang taxi kinahangalan nga ang mga drivers ang ginpaagi sang tagsa ka mga operators sa thermal scanning, may barrier nga magaseparar sang driver kag pasahero, may yara sang tray nga pagabutangan sang bayad, may yara sang alcohol, kag kinahanglan nga nadisinfect kag nasanitize ang taxi.
Pahayag pa ni Yap, sa pagsakay sang taxi, kinahanglan nga may yara sang face mask ang pasahero, bangud kun wala, indi ang mga ini pagpahanugutan nga makasakay.
May yara suno sa iya sang personal information sheet nga igahatag sa diin pagapermahan ini sang pasahero agud mangin basehan sa tion nga may patigayunon nga contact tracing, apang iya gin-athag nga optional ukon boluntaryo lang ang pagperma.
Dugang pa sang natungdan, 50% lang ang pasahero sa tagsa ka unit sang taxi, kag magapabilin sa P40 ang flag down rate.
