ILOILO CITY – Gin-athag ni Anilao Mayor Nathalie Ann Debuque nga wala nakalagaw kag wala man sang exposure sa sinoman gikan sa ila nga banwa ang repatriate nga nagpositibo sa Coronavirus Disease 2019.
Ang nagpositibo amo si WV #115 nga isa ka 39 anyos nga lalaki gikan sa nasambit nga banwa.
Sa interview sang Bombo Radyo kay Debuque, iya ginpahayag nga sang Pebrero 26 naghalin ang nasambit nga lalaki sa Spain kag nag-abot sa Manila sang Pebrero 28.
Mayo 26 naman sang nag-abot sya sa Iloilo kaupod ang iban pa nga mga Ilonggo repatriates sa diin ginsugat siya mismo sang Local Government Unit sang Anilao kag ginderetso sa Common Quarantine Facility sa isa ka eskwelahan sang nasambit nga banwa.
Suno kay Debuque, Mayo 29 sang nakitaan sang sintomas ang nasambit nga pasyente kag bangud diri ginpaidalom sya liwat sa swab test sa diin nagpositibo ang iya nga resulta.
Dugang sang natungdan, ginrefer na sa isa ka COVID-19 hospital sa Iloilo ang nasambit nga pasyente.
Nagpasalig si Debuque nga wala sang dapat nga kabalak-an ang pumuluyo sang iya nga banwa bangud mahimo nga magresulta ini sang pagpanic.
Nag apelar man ang alkalde sa mga pumuluyo nga mangin vigilante kag gilayon nga makig-angot sa tion nga may yara sila sang kilala nga nakasulod sa ila lugar nga gikan sa iban nga pungsod ukon sa iban man nga bahin sang Pilipinas.
Kadungan sini, nagpaandam man ang natungdan nga hugot nila nga iga implementar ang paghatag sang penalidad sa sinuman nga madakpan nga nagapalapta sang sala nga impormasyon.
Natalana naman nga magsapol ang tanan nga mga punong barangay sa banwa sang Anilao agud istoryahan ang mga lihok nga ila patigayunon agud masigurado nga indi na maglapta pa ang makamamatay nga virus sa ila nga lugar.
