ILOILO CITY– Malipayun subong si anay Iloilo Governor Arthur Defensor Sr. nga nagasaulog sang Father’s Day lakip na ang pagtungod sa iya responsibilidad bilang isa ka amay kag padre de pamilya.
Sa Good Morning Philippines Program, ginpahayag ni anay Governor Defensor nga subong nga wala na siya nagaserbe sa pumuluyo, madamo na siya sang tion agud matungdan ang iya pagka amay sa iya mga anak.
Suno kay Defensor Sr, sang yara pa siya sa patag sang pulitika, may yara man sang tion nga nasubuan siya bangud wala niya nahatagan sang oras ang iya kabataan, kag wala siya sang tion agud makahampang sa ila.
Apisar sang kakulang sa oras suno sa anay gobernador, iya man ginapasiguro nga ginahatag niya ang iya masarangan agud mahatag ang kinahanglanon kag pag-giya sa iya mga kabataan.
Ginsigurado man sang natungdan nga mangin madinalag-on sa ila tagsa ka pagpangabuhi ang iya mga anak.
Sa bahin naman sang nangin desisyon sang iya mga anak nga sanday Iloilo 3rd District Representative Lorenz Defensor kag Iloilo Governor Arthur Defensor Jr. nga magsulod sa pulitika, iya ginpahayag nga wala niya ang mga ini ginpilit ukon gin-engganyo nga sundon ang iya pagka politiko.
Suno sa anay gobernador, mismo ang iya mga kabataan ang nagdesisyon nga magsulod sa pulitika, kag wala man siya nagatugda ukon naga-intra sa ila trabaho, magluwas na gid lamang kun kinahanglanon niya nga maghatag sang iya kumento.
Samtang, nagbilin man ang anay gobernador sang mensahi para sa iya mga kabataan.
Suno sa anay gobernador, padayunon lang sang iya mga kabataan ang mga maayo nila nga hinimuan, mangin mabakod kag padayunon kun ano man ang ila ginapakigbato para sa kaayuhan.
Ginapanugyan man sang natungdan sa ila mga kabataan nga tinguhaan sang mga ini nga indi madagtaan ang ila tagsa ka mga pangalan, tubtob nga matapos ang ila pagpanerbisyo sa mga pumuluyo.
