ILOILO CITY- Naglab-ot na sa 85 ang na-isyuhan sang citation ticket bangud sa paglapas sa ordinansa angot sa pagsuksok sang face mask kag pagtuman sang physical distancing.
Sa interview sang Bombo Radyo kay Mr. Nestor Canong, head sang Task Force on Moral and Values Formation (TFMVF) nga katapo sang Iloilo City Compliance Monitoring Team (CMT), iya ginpahayag nga ini nga mga violators ang narecord humalin sang Hunyo 30 tubtob Hulyo 6.
Suno kay Canong,may yara sang kapin 200 ka mga compliance officers nga istrikto nga nagapatuman sang Regulation Ordinance 2020-061 ukon Wearing of Face Mask in Public kag Regulation Ordinance 2020-066 ukon Implementing Physical Distancing.
Ang nasambit nga mga ordinansa ang nagapatuman sang P500 nga penalidad sa mga violators, samtang ang ordinansa sa physical distancing ang nagapatuman sang P5,000 nga multa para sa mga public establishments nga wala nagapatuman sang isa ka metro nga antad sa mga tawo sa sulod sang ila establisiemento.
Tatlo man ka establishments lakip na ang billiard hall kag internet cafes ang na-isyuhan na sang citation tickets.
Gin-athag naman ni Canong nga ang mga violators sang nasambit nga mga ordinansa ang wala ginaposasan kag sa baylo, ginaistorya lang antes isyuhan sang citation ticket.
