ILOILO CITY – Indi na mahimo nga makasulod sa syudad kag probinsya sang Iloilo ang mga residente sang Bacolod City, Negros Occidental kag Negros Oriental.
Ini matapos nga ginmandu nanday Iloilo City Mayor Jerry Treñas kag Iloilo Gov. Arthur Defensor Jr. nga temporaryo anay nga pagasiraduhan ang mga pantalan bangud sa padayon nga pagtaas sang kaso sang Coronavirus Disease 2019 (COVID-19) sa nasambit nga mga lugar.
Buwas nga adlaw, Hulyo 22, mangin epektibo na ang pagpasirado sang border sa syudad kag probinsya sang Iloilo apang exempted diri ang delivery sang essential goods kag cargoes.
Ang nasambit nga desisyon ang ginkasugtan sang COVID-19 task force kag napahibalo naman ang tagsa ka Local Government Unit sa Iloilo.
May kaangtanan diri, nagmandu man si Mayor Evelio “Bing” Leonardia nga pagasiraduhan man ang pantalan sa Bacolod City kag dumili-an ang pagpasulod sang mga pangayaw.
