ILOILO CITY – Nagdangat na sa 810 ang kumpirmado nga kaso sang Coronavirus Disease 2019 (COVID-19) sa Western Visayas.
Ini matapos nga 13 ka panibag-o nga kaso ang na record as of July 21 kun sa diin 35 naman ang nagdugang sa listahan sang mga naka-recover kag isa ang nagdugang sa casualty.
Bangud sini, nagsaka na sa 506 ang naka-recover kag 16 naman ang ginbawi-an sang kabuhi.
Ang napatay amo si Patient 804 – 69 anyos nga lalaki sang Iloilo City Proper kag may kaangtanan diri, ginpahayag ni Dr. Ma. Sophia Pulmones, pinuno sang Local Health Support Division sang Department of Health Region 6, nga sang Hunyo 25 sang nakitaan sang sintomas ang nasambit nga pasyente.
Hunyo 29 sang nagpakunsulta ang pasyente sa isa ka health center, Hulyo 6 sang na-admit sa hospital kag gilayon nga ginkuhaan sag Swab sample, Hulyo 7 sang ginbawi-an sang kabuhi apang Hulyo 21 na sang nakumpirma nga nagpositibo ini sa virus.
Gin-athag ni Pulmones nga may yara na nga daan sang balatian ang pasyente apang mahimo nga ini ang naglala bangud sa COVID-19.
Tatlo ka health facility staff kag dugang nga 23 ka iban pa ang naka-angkon sang close contact kag ginahulat pa ang resulta sang ila COVID-19 test.
Sa subong:
Aklan – 6
Antique – 15
Capiz – 6
Iloilo Province – 67
Negros Occidental – 32
Bacolod City – 27
Iloilo City – 50
Repatriates/ LSIs – 607
Tagged to other region – 9
