ILOILO CITY – Nagdangat na sa anom ka mga medical technologists ang nagpositibo sa Coronavirus disease 2019 (COVID-19) sa Westen Visayas Medical Center Sub National Laboratory.
Sa exclusive interview sang Bombo Radyo kay Dr. Joseph Dean Nicolo, medical center chief sang Westen Visayas Medical Center, iya ginpahayag nga temporaryo anay nga i-lockdown ang Laboratory Department kag Sub National Laboratory.
Suno kay Nicolo, temporaryo anay sila nga indi magbaton sang mga specimen.
Ang mga nabilin naman nga technical team ang ginatapos na ang swab nga ila nabaton sang Agusto 10 tubtub 11 agud mapagwa gilayon ang resulta.
Sa subong ang mga health workers nga nagpositibo sa COVID-19 ang na confine sa ospital kag maid-id nga gina monitor sang mga doktor.
Ginalauman naman nga magbalik na sa normal nga operasyon ang ospital sa Byernes.
Nagpangayo man sang paghangop si Nicolo sa temporaryo nga pagpasirado sang ila out patient laboratory services.
