ILOILO CITY – Balik-awot para sa Iloilo City Council ang mandatory nga pagsuksok sang face shield sa pagsakay sa depampasahero nga salakyan kag sa pagsulod sa mga mall.
Ini ang rason kun nga-a naghatag sang privilege speech si Councilor Romel Duron, chairman sang Committee on Transportation, may kaangtanan sa nasambit nga isyu.
Sa interview sang Bombo Radyo kay Duron, iya ginpahayag nga ang mandu nga mandatory nga pagsuksok sang face shield sa pagsakay sa mga depampasahero sang salakyan ang naghalin sa Department of Transportation kag indi sa Department of Health ukon sa Inter-Agency Task Force.
Suno kay Duron, kasubong nga wala gintun-an sang maayo ang kaundan sang memorandum circular nga ginpaguwa sang Agosto 4 kag sang Agosto 15, gilayon ini nga ginpatuman.
Sa pagpaathag ni Duron, may mga driver nga indi makasaho sa pagsuksok sang face shield kag kun madugay na ang pagsuksok sini, nagaburon ang panulukan nga kun kaisa, mangin tunaan pa sang aksidente.
May kaangtanan naman sa mga pasahero nga wala nagasuksok sang face shield, ginpahayag sang natungdan nga ang violator mismo ang pagahatagan sang silot sa baylo nga ang driver kag kwestyonable man ang reckless driving nga violation.
May kaangtanan naman sa mandatory nga pagsuksok sang face shield sa pagsulod sa mga mall, ginpahayag sang Konsehal nga ang Department of Trade and Industry ang nagmandu sini kag indi ang Department of Health ukon ang Inter-Agency Task Force.
Bisan ang Department of Health suno sa natungdan ang wala nagamandu nga mangin mandatory ang pagsuksok sang face shield kag sa baylo, gina-encourage lang ang pagsuksok sini sa mga pampubliko nga lugar.
