Malipayon nga gin-anunsyo ni Sen. Ronald “Bato” Dela Rosa nga nagnegatibo na siya sa Coronavirus disease 2019 (COVID-19).
Ini matapos ang tatlo ka semana nga pag-away batok sa nasambit nga virus.
Suno sa senador, nabaton niya ang iya negative test result sang Disyembre 11, Byernes,ukon 20 ka adlaw matapos nalatnan siya sang COVID-19.
“Negative na ako since last Friday,” pahayag ni Dela Rosa.
Kaangot sini, plano subong sang senador nga magdonar sang iya blood plasma.
Ini bilang pagtuman man sa iya promisa nga mangin “better person” sa tion nga mag-ayo na siya sa balatian nga nagpatay sang minilyon ka mga tawo sa bilog nga kalibutan.
“As we said during our nightly prayers, ‘Lord, after winning this battle, you will see a different person in us. We will devote our remaining time on earth fulfilling Gods intents and desires,'” dugang pa ni Dela Rosa.
Sa subong suno kay Dela Rosa, ang iya nga misyon sa kabuhi amo ang pagsunod sa 10 commandments sang Diyos.
“No vice ako ever since. More on fulfilling God’s commandments.”
Una na nga nalatnan sang COVID-19 sanday Senators Juan Miguel Zubiri, Sonny Angara, Aquilino “Koko” Pimentel III kag Ramon “Bong” Revilla Jr. apang sa ulihi, nag-ayo naman sa balatian.
