ILOILO CITY- Nagakabalaka sa gihapon ang mga pumuluyo sa Washington DC sa Estados Unidos sa mga posible matabo sa mga masunod nga adlaw matapos ang natabo nga riot sang mga supporters ni US President Trump agud punggan ang pormal nga pagpungko ni US President-elect Joe Biden.
Suno kay Patricia dela Torre, Bombo International Correspondent sa Washington DC, iya ginpahayag nga apisar nagbiya na sa US Capitol ang mga nagpatigayon sang riot, may kakulba sa gihapon bangod mahimo nga mangin agresibo kag bayolente ang mga tagsakdag ni Trump.
Suno kay dela Torre, sa subong napalibutan na sang national guards kag nagpahamtang sang barikada sa perimeter sang Capitol.
Apat na ang patay nga ginalakipan sang isa ka babaye nga natiruhan sa dughan samtang tatlo naman ang nagsuprir sang medical emergencies.
Pila man ka mga police officers ang nagkalapilasan sa riot.
Nahibaluan nga ginatos nga mga Trump supporters ang nagsulong sa U.S. Capitol sa katuyuan nga baliskaron ang resulta sang eleksyon nga nagpwersa sa kongreso agud i-postpone ang sesyon nga magasertipika sa kadalag-an ni President-elect Joe Biden.
