ILOILO CITY- Nag-umpisa na subong nga adlaw ang isa ka semana nga temporary road closure sa area nga sakop sang construction site sang Ungka II flyover sa Pavia, Iloilo nga magalawig tubtob sa Marso 21.
Ini may kaangtanan sa installation sang beams ukon girders para sa ginatukod nga flyover sa diin 32 tanan ka mga girders ang iga-install sa sulod sang pito ka adlaw.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga nangin epektibo ang ginpatuman nga rerouting apang may mga lugar gid man kon sa diin nagpugok ang trapiko.
Suno kay Conlu, magapatigayon naman sila sang post-evaluation sa una nga adlaw sang road closure agud mahibaluan kon may mga adjustments pa nga dapat himuon.
Nahibaluan nga apektado ang dalan sa Ungka II Circumferential Road intersection pakadto sa U-turn slot sang exit sang Christ the King rason ng ginaabisuhan ang publiko kag salakyan nga padulong sa syudad nga maglabay sa alternatibo nga ruta.
Ang mga motorista nga halin sa kabanwahanan ang mahimo nga magliko pa-tuo sa Circumferential Road pakadto sa Brgy. Jibao-an, Pavia pakadto sa Mandurriao; mahimo man magliko pa-wala sa Circumferential Road, pakadto sa Brgy. Tacas, pakadto sa Quintin Salas, diretso sa Jaro Plaza; ukon magliko pa-wala sa Circumferential Road, pakadto sa Brgy. Tacas, pakadto sa Buhang diretso sa Jaro Plaza.
Mahimo man maglabay sa Pagsanga-an, Pavia pakadto sa Brgy. Tacas pakadto sa Quintin Salas diretso sa Jaro Plaza ukon maglabay sa Aganan, Pavia pakadto sa Jibao-an (Bangga Singko), pakadto sa Mandurriao.
Ang mga salakyan naman nga naghalin sa Iloilo City padulong sa Pavia ang mahimo maglabay sa sini nga mga ruta: Quintin Salas pakadto sa Brgy. Tacas pakadto sa Pagsangaan (Pavia Road); Quintin Salas pakadto sa Brgy. Tacas pakadto sa Circumferential Road pakadto sa City Mall (Pavia) diretso sa Pavia Road; kag Jaro pakadto sa Mandurriao, pakadto sa Jibao-an, pakadto sa Circumferential Road, lapos sa Ungka II ,direkta sa Pavia Road.
Sa sulod sang pito ka adlaw, magasugod ang road closure alas-siete sa aga tubtob alas singko sa hapon.
