Ginkumpirma sang Malacañang nga si Presidente Rodrigo Duterte mismo ang nagmando nga untaton ang pag-anunsyo sang brand sang COVID-19 vaccine antes ang patigayunon nga bakuna.
Suno kay Presidential spokesperson Atty. Harry Roque, ginhimo sang presidente ang nasambit nga mando agud malikawan ang pagdinaguso sa mga vaccination site.
Ini ang ginpahayag sang presidente matapos nakalab-ot sa iya ang impormasyon nga nagdinugok ang mga tawo sa vaccination sites nga nagapangbakuna sang US-made Pfizer COVID-19 vaccine.
“Si Presidente ang nag-utos niyan dahil nakita niya ‘yung kawalan ng social distancing doon sa ilang lugar kung saan in-announce ang pababakuna ng Pfizer,” pahayag ni Roque.
Una naman nga ginpahayag sang Department of Health (DOH) nga ginaduso man nila ang pagtago sang brand sang bakuna sa publiko agud wala sang pagdinaguso nga matabo kag mapatuman ang health protocol.
Gin-athag man ni Roque nga ang tanan nga mga bakuna ang nag-agi sa maid-aid nga pagtuon kag safe batok sa COVID-19 sa diin nagakadapat nga itublok ini sa butkon.
“Ang pinakamabuting bakuna ay ‘yung ilalagay sa inyong mga braso,” dugang pa ni Roque.
Matapos ang anunsyo sang DOH, ginkumpirma man sang Department of the Interior and Local Government (DILG) nga ang tanan nga nga local government units (LGUs) ang indi na magpahibalo sang brand sang
COVID-19 vaccine, antes ang pagpangbakuna.
