ILOILO CITY – Magasapol pa si Iloilo City Mayor Jerry Treñas kag ang bag-o nga pinuno sang compliance team sang syudad sang Iloilo may kaangtanan sa bag-o nga mga direktiba sa pagpatuman sang mga health protocols sa Iloilo City.
Si Mr. Nestor Canong, chairman sang Task Force on Moral and Values Formation, amo ang gin-appoint sang alkalde nga amo ang magabulos sa kontrobersyal nga si Fernando Jose ‘Boyet’ Rico nga nag-resign sa iya pwesto matapos ang eskandaloso nga pag-post sa social media sang ‘Lunch After Swabbing’ nga isa ka maathag nga paglapas sa COVID-19 protocol.
Si Rico ang nagapabilin nga Executive Assistant for Barangay Affairs, samtang epektibo naman subong nga adlaw, Mayo 27, ang pagpungko ni Canong bilang head sang compliance team.
Sa interview sang Bombo Radyo kay Canong, iya ginpahayag nga kinahanglan nga i-align sa gihapon ang bag-o nga mga protocol sa direktiba sang alkalde ilabi na bangud nagasaka ang kaso sa Iloilo City nga subong napaidalom sa Modified Enhanced Community Quarantine (MECQ).
Nagpangayo man si Canong sang kooperasyon sa publiko sa padayon nga pagsunod sa minimum health standards.
Nagapati man si Canong nga dapat nga kalimtan na ang kontrobersiya dala sang ‘Lunch After Swabbing’ post ni Rico kag magmove-on na sa paghatag solusyon sa mas daku nga problema sang syudad.
“Natabo na ang natabo. Nakapangayo na siya [Boyet Rico] sang pasaylo. Let us move on. Let us move forward kay nakahibalo kita nga kadaku ang kontrobersiya nga ginaatubang naton. Let us leave behind ang kontrobersiya nga gin-atubang naton sang nagligad nga adlaw. Ang importante mabatuan naton ang problema sa COVID-19 kag maproteheran ang mga pumuluyo ta sa syudad,” pahayag ni Canong sa pamangkot kun nakabatyag man siya sang pressure sa iya bag-o nga katungdanan. #
