ILOILO CITY- Nagalibog ang ulo sang isa ka driver kon ano ang iya mangin kapalaran sa idalom sang service contracting program sang Land Transportation Franchising and Regulatory Board sang Department of Transportation.
Sa interview sang Bombo Radyo kay Glen Fritz Patingo, driver sang traditional jeepney nga may ruta nga Ungka ITGSI- Iloilo City, iya ginpahayag nga kahapon lang, Hunyo 22, narehistro sa service contracting program ang iya nga jeep apang manugtapos na ang ini nga scheme sang gobyerno sa Hunyo 30, 2021.
Suno kay Patingo, kon mag-expire gid man ang nasambit nga scheme, walo lamang ka adlaw ang iya byahe sa idalom sang Libre Sakay.
Nahibaluan nga sa idalom sang Service Contracting Program, nakakontrata sang duha ka bulan ang isa ka salakyan kon sa diin magapasakay sila sang libre sa mga Authorized Persons Outside Residence(APOR) kag ang gobyerno na lang ang magabayad sa ila.
