ILOILO CITY- Ginaproblemahan sang transport groups sa Syudad sang Iloilo kon paano tumanon ang ginpagwa sang Land Transportation Franchising and Regulatory Board nga bag-o nga Memorandum Circular (MC) 2021-042 ukon ang Road Safety Guidelines to be Observed by Public Utility Vehicles(PUV), with Priority to Active Transport (AT) ukon ang mga nagalakat kag nagabisekleta, kag Light Mobility Vehicles (LMV)/Personal Mobility Devices (PMD) Users.
Sa nasambit nga memorandum, nasaad nga wala ginapahanugutan ang mga PUVS mga magtabok, magpundo, magpasaka sang pasahero ukon magpark sa bike lanes kag pedestrian lanes.
Sa interview sang Bombo Radyo kay Mr. Raymundo ‘Boyet’ Parcon, presidente sang Iloilo City Loop Alliance of Jeepney Owners and Drivers Association (ICLAJODA), iya ginpahayag nga halos imposible ini nga tumanon bangod kalabanan sa mga bike lanes ang nagasampaw man sa mga loading bays para sa mga jeep.
Suno kay Parcon, sadto pa man ginapakigbato na nila nga wala nagakaangay nga butangan sang bike lane ilabi na ang Iloilo City Proper Area kag kun pahamtangan gid man, kinahanglan nga iseparar ini agud nga indi man mabutang sa alang-alang ang safety sang mga bikers.
Apang ginpahayag niya nga wala gid ginpamatian sang syudad ang ila suhestiyon kag wala man natun-an sang maayo sang konseho ang pagpabutang sang bike lane.
Nahibaluan nga pila pa gid ka butang nga ginamando sa amo nga memorandum amo nga indi dapat magpondo ang jeep sa bike box sa mga intersections bangud para lang ini sa mga cyclists nga nagahulat; dapat hatagan sang drivers sang prayoridad ang Active Transport (AT) kag Light Mobility Vehicles (LMV)/Personal Mobility Devices (PMD) Users kag mag-obserba sang regulasyon sa trapiko, magsignal sang intensyon nga magliko kag hatagan prayoridad ang paglabay sang Active Transport kag Light Mobility Vehicles/Personal Mobility Devices.
