ILOILO CITY- Wala napunggan ni Iloilo City Mayor Jerry Trenas nga magpautwas sa kalain sang buot sa atubang ni Presidential Spokersperon Atty. Harry Roque kadungan sang iya pagbisita sa syudad sang Iloilo.
Sa ginpatigayon nga turnover ceremony sa Iloilo Freedom Grandstand para sa COVID-19 vaccine kag mga hospital equipment nga dala ni Roque, ginkwestiyon ni Trenas kon ngaa Sinovac vaccines ang ginapadala sa Iloilo samtang Moderna naman sa iban nga lugar.
Suno kay Trenas, daw kaangay nga Diyos ang pagkabig sang gobyerno sa iban apang kaangay sang amo(unggoy) naman ang pagkabig nila sa mga tawo sa Iloilo.
Dugang pa sang alkalde, sa pagkamatuod, halos katunga na sang mga pumuluyo sang syudad ang luyag nga magpabakuna apang ang problema lang amo nga tuman ka kulang ang bakuna nga ginapain para sa Iloilo City.
Sa pihak sini, nagpasalamat man ang alkalde kay Roque sa pagpadulong sa Iloilo City kag pagdala sang ayuda para sa syudad.
Nagpasalig man ini nga buligan ang presidential spokesperson kon magpadalagan ini sa pagka-senador.
Kaupod ni Roque nga nagpadulong sa Iloilo sanday Health Undersecretary Leopoldo Vega, Health Assistant Sec. Romeo Ong, kag DOH NCR Director Dr. Ariel Valencia.
